كان بقالى فتره مختفيه عن عالم التدوين و الكتابه .. ولكن اللى خالانى مختفيه كانت حاجه عملتها وبحبها وفخوره بيها أوى ..
أنا كنت بشتغل فى مسرحية عرايس .. كان فريق عمل كبيييير أوى .. واحنا اللى بدأنا وعملنا كل حاجه فى المسرحيه من أول ديكور لحد العرايس .. و طبعاً ده كان تحت اشراف دكتورنا العظيم د. أسامه محمد على .. و بفضل تعاون التسع وعشرون 29 فرد طلعوا المسرحيه الجميله والعمل المتكامل ده
و اللى اخرج العمل ده كان برده دكتورنا وهو دكتور أسامه
أما بقى عن الدور اللى أنا عملته فى المسرحيه فكان أدائى لصوت شخصية بينوكيو و كمان قمت بمعالجة قصة بينوكيو وكتابةواعداد سيناريو المسرحيه ده غير انى كمان بحرك ماريونت على المسرح وطبعأ مش هنسى فضل الأساتذه اللى وجهونى عشان يطلع السيناريو بالشكل ده ومنهم دكتور خالد الخربوطلى و دكتور أسامه محمد
المهم أنا عايزه أقولك أنكم كلكم معزوميين عشان تتفرجوا على شغلنا كلنا أحنا ال 29 فرد
عزماكوا بجد ونفسى تشوفوا لما كلنا احنا الطالبه والدكاتره أتعونا طلعنا عمل شكله أيه
المسرحيه هتتعرض يوم الأثنين (21/4/2008)الساعه السابعه مساءاً والثلاثاء (22/4/2008) الساعه سابعه بليل و يوم الأربع(23/4/2008) الساعه عشره الصبح ... ومتنسوش "الدعوه عامه" "
سيقام العرض على مسرح كلية التربيه النوعيه - جامعة القاهره ..هى فى شارع التحرير جنب كلية رياض أطفال هتلاقوا كليه تربيه نوعيه
(محطة مترو البحوث)
:D
دى صور لبعض الشخصيات فى المسرحيه
17 comments:
الله الله الله
بجد انا باعشق الشخصيه دي
بس انا مش كنت اعرف انك فنانه للدرجه دي
على العموم بكرة انا مش هاقدر لكن ان شاء الله احاول جاهدا اني احضر يوم التلات
بجد ان شاء الله احاول ويارب ينفع
انا بقى مش هاقدر اقول غير كده دلوقت
انتظري بقى تعليقي بعد المشاهدة
تحياتي وعذرا مقبولا للغياب الطويل
ابقى صوريها فيديو بعد العرض مايخلص علشان اللي مش هايقدر يشوفها
أخجلتم تواضعنا .. و أنا هنتذر تعليقك بعد ما تتفرج عليها .. انا عارفه ان الدعوه جت ماتأخره شويه بس والله كنت مشغوله جداً فى البرفات و مكنتش عارفه اقعد على النت
هستناك تشوف المسرحيه
;)
مبرووووك يا بنوتة يا جميلة :) حلو أوي أوي اللي بتقوليه دة
أنا آخري كان الحاجات دي لمااشتغلت مدرّسة و برده كنت بعشقها أوي، أتمنالك التوفيق في المسرحية بجد
بصراحة مش عارفة هعرف آجي و لا لأ، بس هحاول أقنع صاحبتي وآجي يوم التلات...لأن النهاردة خلاص الاتنين وصعب أوي، عموما حتى لو مش قدرت آجي.. بجدبجد أتمنالك التوفيق كتييير، و بعد المسرحية مستنياكي تقولي أخبارها و ترجعي للتدوين كمان "ياريت يعني" فعلا
:)
بس عارفة إن بينوكيو دة شخصية مهمة أوي عندي و كل ماأحس حد مزودها أقولله مناخيرك هتطول زي بينوكيو؟؟ :))) يللا، سلام يا قمر
السلام عليكم
أنا كمان آسف على الانقطاع لكني فعلاً كان عندي ظروف كتيرة متداخلة
ده غير إني دلوقتي في طور سخونية وطالع عيني وبرد ودوخة وكل ده ولتامن مرة يجيلي برد السنة دي
ربنا يستر
المهم ألف مبروك بجد والله من قلبي فرحانلك وبالذات إنك بتعملي حاجة بتحبيها وفرحانة بيها وبتخلصي فيها وأهم حاجة إنها بتسعدك
بس هو العرض يوم إيه بالظبط والساعة كام؟
i wish i were a butterfly:
الله يبارك فيكى يا هبه .. أنا كمان بعشق الشخصيه دى أوى .. هستنى حضوركم انتى وصديقتك
;)
الاستاذ:
و عليكم السلام
ألف سلامه عليك
الله يبارك فيك يا سمير و على فكره المسرحيه أيام 21/4/2008 و 22/4/2008
الساعه سابعه مساءاً
و يوم الأربعاء(23/4/2008) الساعه عشره الصبح
انا اسف جدا ليكي
بجد ادين ليكي بالاعتذار ده
ظروفي للاسف اجبرتني اني مش اوفي الوعد واحضر لكن اعتقد انه انا اللي فاتني العرض مش هو اللي فاتني
ومتأكد انه زي ما كان واضح من كلماتك انكوا تعبتوا وابدعتوا واكيد ربنا عوضكوا خير
ان شاء الله تكوني اتوفقتي ويارب دايما ف نجاح
اولا برافو على طموحك الجميل ، انا دخلت على بلوجك بس مكنتش اعرف ان العرض خلص للاسف
ياريت لو انتى مسجلة العرض تعملى ابلوود على اى سايت وتقولي عليه
وعقبال جميع العروض اللى جاية
اتمنى تزورى البلوج بتاعك وتقولى رأيك
http://tayer-ya-hawa.blogspot.com
بجد بجد
الف مبروكمن كل قلبى
والحمد لله انك قدرتى اتحققى جزء من طموحك
بس احنا عاوزين نشوف العرض
منى
بجد انا اسف جدا اني شوفت البوست ده متأخر
كان ممكن اوي احضر العرض
وخصوصا اني كل يوم بحكم شغلي في شارع التحرير
:(
قدر الله وما شاء فعل
وان شاء الله تتعوض
بس طمنيني عملتي ايه ف المسرحية
ربنا يوفقك دايما يا بنوتة
:)
ولو :
أنشاء الله العرض هيتعرض تانى قريب بس بعد الأمتحانات وكده .. واكيد المره الجايه مش هيفوتك تانى انشاءالله .. انا عارفه والله الظروف اللى بتحكم الواحد ربنا معانا كلنا
tayer ya hawa
الله يبارك فيكى واكيد هزور المدونه بتاعتك .. ومرسى كتير على زيارتك الجميله
نورتى البلوج
;)
الله يبارك فيك وانا ناويه انشاء الله أنزل جزء من اعرض عشان تشفوه .. لأنى مينفعش أنزل العرض كله .. عشان حق العرض وكلام كده.. بس أكيد انتوا هتشفوا العرض كله لو جيتوا عرضته تانى قريب .. وجزاكم الله خير .. حاسه أنها من قلبك فعلاً
ألام وامال
قدر الله وماشاء فعل وعلى فكره ده غلط منى انا .. لأنى نزلت البوست متأخر جداً .. بس ده لأنى مكنتش عارفه الموعد الأصلى للعرض غير أخر يوم بروفه .. وطبعاً عقبال ماكتبت البوست كان تانى يوم العرض على طول .. بس أكيد المره الجايه أنا هقولكوا قبليها بكتيير .. عشان بجد أنا عارفه أنى جييت وقلت فجأه وكده .. لكن أنا خفت أقول مثلاً على العرض ويحصل حاجه ومنعرضش المسرحيه فأبقى عملت أحلام على ضباب أنا قلت أستنى لحد لما أتأكد من كل حاجه .. ده غير التوتر والقلق اللى انا كنت فيه , والحمدلله أنى وصلت لكده وعرضنا فى الأخر
:D
والمره الجايه للعرض هتكون موجود ... و مفيش أعذاار
:D
مواطن زهقان
الله يبارك فيك وانا ناويه انشاء الله أنزل جزء من اعرض عشان تشفوه .. لأنى مينفعش أنزل العرض كله .. عشان حق العرض وكلام كده.. بس أكيد انتوا هتشفوا العرض كله لو جيتوا عرضته تانى قريب .. وجزاكم الله خير .. حاسه أنها من قلبك فعلاً
الف مبروك على المسرحية
وعقبال السينما والتليفزيون
بنشاركك الفرحة
ولو اتزنقتوا فى كلمات اغنية انا حاضر
شاعر/ناجح يوسف فهمى
الف مبروك المسرحيه
مع انى فاكر انى علقت على البوست ده قبل كده بس مش عارف تعليقى راح فين
انا طبعا ماكونتش وجود وقت العرض
بس هنتظر المسرحيه الجايه لانى بحب العرايس جدا
مع خالص التهانى
تحياتى
alabalatta:
الله يبارك فييك .. وعلى فكره انا كان نفسى أوى يكون فى المسرحيه أغنيه .. بس أنا مش بعرف غير انى أكتب خواطر أو أكتب قصص .. معرفش اكتب أغنيه لقصه خالص .. فابجد فرصه سعيده جداً أنى أتعرفت عليك
هو أسم البلوج بتاعك "على بلاطه"؟؟؟
momken:
ممكن ميكونش التعليق أتسيف على البلوج ... بس حصل خير .. والله يبارك فيك .. انشاء الله العروض الجايه هبقى أقولكوا قبلها بكتير
انتي بتتأخري ف البوستات اوي كده ليه
عايزين نقرا ابداعاتك كل فترة
عديت ولم اجد جديد
المرة الجاية هاجيب جديدي معايا
مش طريقة معاملة دي
هههههه
تحياتي
ولو:
أنا نزلت أخر حاجه كتبتها (.. على فكره أنا بتأخر فى البوستات .. لأنى والله بقيت بخاف ل حاجتى اللى كتبتها تتاخد (تتسرق يعنى )
بس أنا لما لاقيت فى ناس كتيير بطلب منى أنى أنزل بوست وخصوصاً بعد سؤالك على بوستاتى .. قلت ملوش لازمه الكلام وهو مكتوب ومحدش بيقراه ولا بيقول عليه رأيه .. فعشان كده أنا نزلت أخر كتاباتى العقيمه ( أنا عارفه أن كتابتى مش مفهومه شويه
:$
و على فكره انا خت الأجازه .. ومبسوطه جداً جداً .. لأنى خلاص (انشاء الله انشاء الله ) هتخرج السنه دى
و تحياتى
good pics
Post a Comment