تااااااااج

التاج دة جالى من ابو صلاح أشكرك والله بجد يا ابو صلاح على التاج وانك وثقت فيا كصديقة ومعلش الرد اتاخر عشان بس كنت مشغولة فى الكلية والنهاردة اجازة فعشان كدة جاوبت علبة النهاردة اتمنى ان تكون صحفى ناجح ...

لو قالولك اختار عصر من عصور مصرعلشان تعيش فيه تختار اى عصر و فى عهد اى حاكم .. واشمعنى؟
هختار عصر سعاد حسنى أيام السبعينات يعنى لان كانت مصر لسة نظيفة موت ومش كل حاجة بايظة زى دلوقتى كمان كنت هختار ايام حكم السادات ... كان فى حاجات كتيرة حلوة أتعدمت دلوقتى .... بقى فى دلوقتى شباب بايظ وحكومة بايظة ....حاجات كتيير لا يتسع الورق لكتابتها

اول اولويه فى حياتك عيلتك ولا شغلك ولا اصحابك؟

أول أولوية فى حياتى عيلتى وبعديها شغلى ثم أصحابى ولو مفيش اصحاب يبقى شغلى وعيلتى بس

ايه اكتر حاجه بتحبها فى رمضان؟
بحب أوى صلاة التراويح والتهجد و ساعة قبل الفطار فى الشارع وانك تشوف الناس أزاى سعيدة لحظة الفطار وبحب اللمة أوى أوى

اوصف ليا اجمل فطار ممكن تفطره
أى أكلة حتى لو فول من غير زيت المهم أنى ابقى وسط اهلى ومع ناس بحبهم .... عموما أنا بحب القلقاس اوى

لو انت حاكم على مجموعه من الافراد هتكون عادل؟؟ طب هتعمل ايه عشان تتأكد انك حاكم عادل؟

لو انا حاكم هحاول اكون عادل على اد ما اقدر ..لانى بحب الحق جدا حتى لوكان هيخسرنى حاجات كتيير بس المهم أنى اقول الحق وأطبق العدل ... عشان أتاكد انى حكمى عادل أستشير الناس ولو انا كمان راضى من جوايا يبقى خلاص أهم حاجة احس برضى نفسى من جوايا وأستشير ناس

اللى بيبوظ الحكام..نفسهم ؟ ولا الشعب ؟ ولا الحاشية المقربة؟؟

أول حاجة نفسهم الضعيفة لان نفس النسان ضعيفة ويليها على طو ل الشعب الضعيف اللى بيستسلم لكل حاجة.. فالشعب مشترك مع الحاكم فى فساد الحكم

مين أكتر اعلامي مصري بتحترمه؟
يعنى أنا كنت بحب اتفرج على حمدى قنديل وساعات بيعجبنى مذعيين ويعجبنى تفكرهم زى تامر أمين كدة يعجبنى ذكاءة ... أنا بحب المذيع اللى يجذبنى انى اتابع معاة واحس انى ذكى وعشان كدة بحترمة

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
أنا طالبة بس نفسى اشتغل مذيعة و صحفية ومخرجة

ايه تانى بلد تتمنى تعيش فيها بعد مصر؟
أسبانيا

اوصف ليا ترتيبات اجمل فرح ممكن تحضره
انا نفسى احضر فرح فى راقصة وطبال ومغنى والله بجد انا نفسى أحضر فرح كدة زى اللى حضرتة ل أختى كان جوة جامد جداً .... وكمان نفسى ملقيش زحمة على البوفية ونفسى كمان تبقى الطحينة اللى فى البوفية معمولة بضمير عشان انا بحب سلطة الطحينة أوى=) ... أنا أحب الافراح الروشة عموماً ونفسى كمان يبقى العريس والعروسة لاقيين على بعض وحلوين كدة ومسمسميين

بتراعي كلام الناس والقيل والقال؟ لو اه او لو لا قول لى ليه؟
لا بكبر دماغى الصراحة انا عن نفسى اللى عايزة اقولة بقولة

صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
لا هتخنق جداً لان الحاجات دى أنا أتعودت عليها ومعرفش استغنى عنها فجاة

السعاده هى؟
أول حاجة ان يكون ربنا راضى عندى والسعادة هى رضا النفس وراحة البال

عندك أمل ؟؟ أسبابك ؟
الحمدلله عندى أمل ... طول ما ربنا معايا وعشان ربنا موجود

لما تحب تهرب من كل شئ بتروح فين؟

بروح على اقرب مكتب واكتب كل حاجة مضيقانى و بعديها أحس براحة اوى اوى ... واشيل اللى كتبتة فى حتة محدش يقراة ولا حتى أنا عشان مفتكرش اللى انا كنت فية

امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
لا انا عارفة انى لسة صغنونة وهفضل صغنونة.. بس لما تمت العشرين وحسيت انى لسة معملتش حاجة فى حياتى مفيدة دة يمكن اليوم اللى حسيت فية انى كبرت اوى وعجزت كمان :P

لما بتعمل عمل خيرى بيكون ايه هو دافعك الاول؟
أن أملى الفرحة فى قلوب الناس دى واشوف بسمة من قلبهم ليا

بتشرب سجاير؟ لو الاجابه اه ايه شعورك لو شفت ست بتشرب سجاير؟ وليه ؟
لأ انا مش بشرب ... ولو شفت ست بتشرب هستحقرها أوى ... بس عادى يعنى هى حرة

بتعرف ايدك اليمين من الشمال ازاي؟
بشوف انهى أيد بكتب بيها

ايه اكتر اله موسيقيه بتحبها ؟
الأرج أوى والطبلة والجيتار عموماً انا بحب كل الالات الموسيقية بس اكترهم الطبلة

فى رأيك ليه الذوق والنخوه اتعدموا؟
لأ لسة فى ذوق ونخوة حتى لو كانوا قليلين بس هما ما اتعدموش يعنى لسة الدنيا بخير

ايه الحاجه اللى لو حصلتلك تبقى سعيد قوى؟؟؟
أنى أللى اوصل لهدفى وأحس انى اللى قصادى بيحبنى من قلبة هبقى سعيييييدة أوىىىىى كمان احس انة بيعمالنى بما يرضى الله

تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
لأ اختار يكون عندى أجنس عربيات عشان انا بعشق العربيات

البحر و لا النيل؟؟؟
البحر

مركب و لا طياره؟؟
طيارة

مجنون و لا عاقل؟؟
مجنون

تقرأ كتاب و لا تتفرج عليه فيلم؟
أتفرج على فيلم

بتمرر التاج لمين؟؟؟
لكل اللى بيزرونى فى البلوج بتاعى واللى لسة ماوصلهمش التاج