أكبر عرائس ماريونت فى مصر

كلنا شوفنا اعلان فودافون اللى فى ميدان مصطفى محمود والمحور.. وشوفنا أحجام العرائس الضخمه اللى فى الاعلان واللى نزلتلكوا

صورها هنا ... اللى أنا عاوزه أقوله ان الدكتور أسامه وهو أستاذى فى الكليه هو اللى عمل العرائس الضخمه دى اللى فى الأعلان ... ولأنه أستاذى وليه فضل كبير أنى أتعلم صناعة عرائس الماريونت ومش بس اتعلمت منه نوع واحد بل علمنا كلنا أنا وزملائى أكثر من نوع ... وانا من فرحتى انه هو اللى عمل العرايس المعروضه فى ميدان مصطفى محمود والمحور(أى ليس عرائس الموجوده على التليفزيون فى اعلانان فودافون التليفزيونيه ولكن أقصد العرائس الموجوده فى اعلان فودافون والمعلقه فى ميدان مصطفى محمود والمحور .. واللى يحب يستغرب يروح هناك ويشوف أحجام العرائس اللى متعلقه)..... بجد شغل رائع يا دكتور وطبعاً زى ما حضرتك عودتنا .

العرض المسرحي العرائسي

بعد النجاح اللى حققتة مسرحية بينوكيو على مدار 35 عرض
سيتم اعادة عرض العرض المسرحي العرائسي بينوكيو على مسرح كلية علاج طبيعي باذن الله يوم الثلاثاء 13-4-2010
في تمام الساعة 5.30
سيبدا العرض بعروض ماسكات ثم يلية العرض المسرحي العرائسي بينوكيو
الدعوة عامة

ودة جزء من المسرحية ... هو حتة صغيرة جداً .. بس دى اللى عرفت أنزلها
http://www.youtube.com/watch?v=79QTzuBWpT4

يلا نشغل بعض

دة عنوان جروب جديد أنا عملتة على الفيس بوك بهدف انى اساعد كل حد مش لاقى وظيفة انة يشتغل .. ويارب حد فعلاً يستفاد منة
ودة اللينك بتاع الجروب للى عاوز يشترك
http://www.facebook.com/?ref=home#!/group.php?gid=352996444013&ref=nf

ويارب الفايدة تعم على الناس كلها

تخاريف قلب وعقل

منطقة بلا عنوان

أصابنى اليأس الى أن غمر قلبى .. أ تلك هى الحياة؟!! ... أ هؤلاء من عشقناهم فى يوم ما

أ خدعنى قلبى .. أم أراد أنا يأخذنى بعيداً عن مشاكل الحياة .. هل أراد أن ينسنى هموم الحياة بعشقاً مجهول ؟!
ليت قلبى يعلم أنة لم يأخذنى عن تلك الهموم بعيدا .. ليتة يعلم أنة جعلنى أتذوق قسوة الحياة من يدة
ليتة يعلم أنة علمنى أن للمشقة مذاق أخر و طعم جديد .. ..
أعلم أننا أحياناً نريد الهرب والتمسك بخيط رفيع لينجدنا .. ولكن عندما نمسك بالخيط ونبدأ فى الهرب .. ثم ينقطع الخيط فجأة .. ليجعلك تقف فى منطقة وسطى ... ليست هى بحياة تريد الهروب منها .. ولا هى أرض الأمان التى كان سوف يرسلك اليها الخيط.. ولكنها منطقه وسطى لا يمتلك أحد تسميتها ..
منطقة تجعلك غير
قادر على التفكير
.. لأنك لا تدرك أين انت ..

أنها منطقة بلا عنوان ولا قلب ..
منطقة بلا حارس ولا منقذ ..

منطقة بلا صديق أو حياة ..

.. منطقة بلا قلباً وعقل
أ هذة هى المنطقة المهجورة التى مكثت عليها؟؟

!!

أم أنها حقاً منطقة بلا عنوان؟

(داخل أحدى مراكب الفضاء حيث يظهر البرافسور هريدى ومعة تلميذتة حسنية والمساعد شحيطة العريف )
(شحيطة العريف يظهر مسرعا تجاة البرافسور هريدى )
شحيطة العريف : يا برافاسوور .. يا برافاسوور .. البنزين اللى حدانا كلة وجع على الأرض .
هريدى : أهى اللى بتجولة دة ياولة .. كدة احنا مش هنعرف نتحرك على الفضا .
حسنية : طب واية الحل يا برافاسوور .!!
هريدى : أنا جريت قبل كدة إننا ممكن نلاجى بنزين فى الفضا .. و أنهم كانوا زمان بيجبوة من الفضا .
حسنية : أيوة صح يا برافاسوور .
هريدى : صح كدة .. علشان كدة لازم كولتنا ننزل من المركبة وندور بره .
حسنية : أيوة صح .
هريدى : صح كدة .. قلنا بجى يا أبو العريف نمشى من أيتها إتجاة ؟
(شحيطة العريف يهرش فى راسة ثم يقول بتهته)
شحيطة العريف : أنا بجول نمشى من الناحية اليمين.
هريدى : براوة عليك .. واهو اليمين بردة بركتة حلوة ..
( يتجة هريدى وحسنية والمساعد شحيطة العريف خارج مركبة الفضاء الى أن يستقروا فى الخارج)
هريدى : شايفين اللى أنا شايفة على الأرض .. دة باينتنة ذهب وياقوت ..(باستهزاء) تكنش دى مغارة على بابا فى الفضا (يضحك) هع هع هع .
شحيطة العريف : لأ يا برافاسوور .. ده الزلط بتاع الفضا
حسنية : أيوة صح .
هريدى : صح كده .. ناولنى يا ولا شحيطة المنظار بتاعى .
( يفتح شحيطة الشنطة التى يحملها ويخرج منها المنظار )
شحيطة العريف : أتفضل يا برافاسوور .. الدكتورة حسنية هى اللى حطتيتة فى الشنطة.
هريدى : هههه دكتورة .. أسمها عالمة يا ولا .. أدينى الطبلة بقى .. قصدى المنظار يا غلباوى .
(ياخذ هريدى المنظار ويمسكة وينظر فية )
هريدى : أية دة .. شايفين اللى أنا شايفة .. دة فى ناس كتير هناك أهى .
( يندفع شحيطة العريف وحسنية تجاة هريدى لينظروا معة فى النظار )
شحيطة العريف وحسنية فى نفس واحد : ورينا كدة .. عاوزيين نشوف أمعاك .. عاوزين نشوف .
(يتأرجح هريدى وحسنية الى أن يسقط الثلاثة وينزلقون من على منطقة تشبة الهرم وفى نهاية الهرم يصطدمون بمجموعه من الناس الغرباء الشكل والذين يرتدون ملابس على هيئة حيوانات )
أحد الغرباء : أنتوا مين ..؟!
حسنية : يا حلاوة يا ولاد .. دول بيتكلموا زايننا تمام .
هريدى يهمس فى أذن حسنية : هههة.. عاملين زى القراصنة زمان .
أحدالغرباء بصوت مرتفع : بقولكم أنتوا مين .
هريدى : هىهىهى .. أحم .. أنا هريدى .. نابغة الصعيد .. ودى حسنية تلميذتى وشحيطة المساعد بتاعى .. أنتوا بجى تطلعوا مين ..!!
غريب أخر : إحنا شعب السنونو .. عايشيين هنا من ألاف السنين .. وبنحكم قرية الفار .
هريدى يضحك : سى نونو .. راحت فين هيبة الرجالة .. عيندينا بنجول على الراجل ..سى السيد مش نونو .. ههههه .. وبعدين جالولى هى الفران محتاجة حد يحكمها !! هعهعهع
أحد الغرباء بصوت مرتفع : خذوهم على ملكنا "شونكال" .. علشان يتصرف معاهم .
(يسحب الغرباء هريدى و حسنية وشحيطة العريف الىالملك .. )
شحيطة هامساً: سامعة يا حسنية .. ملكهم أسمة شوشو .. باين عليهم ناس أبهة أوى .
حسنية : أيوة صح يا برافاسوور .
هريدى : صح كده .
( يمشى الثلاثة مع الغرباء الى الملك الى أن يقفوا أمامة )
الملك شونكال : سكوووووت .. دلوقتى كبيركم يقولى أية اللى جابكم أرضنا ؟
هريدى : جينا فى مهمة علمية .. لكن البنزين اللى حدانا خلص .
الملك شونكال : بسيطة ..إحنا ممكن نساعدكم ونديكم بنزين اللى ناتج من الجثث الى أتحللت عندنا .
هريدى : أتخللت .. هو أنتوا عينديكم بتخللوا البنى أدميين .. إحنا عندينا بنخلل الجزر والذى منة ..
الملك شونكال بعصبية :أتحللت مش أتخللت .. عموماً أحنا شرطنا علشان نديكم البنزين .. أنكم تحكولنا على موقف من حياتكم تحت على الأرض .
هريدى : هىهىهى .. ودى حاجة تتحكى .. دة تتشاف بس ..
شحيطةالعريف : يا برافاسوور .. يابرافاسوور .. أحكيلهم على الولا مدوحس الغلبان اللى فى البلد .
هريدى : أخرس يا ولا .. أنا هحكيلكم على موقف حصل لى تحت على الأرض.
الملك شونكال : وإحنا موافقين .
(صورة باهتة للحمار الأزرق فى أخضر)
هريدى : مرة فى البلد حدانا أشتريت حمار لونة أزرق فى أخضر .. كان سعرة غالى جوى .. وأنى كنت فرحان أنة غير كل الحميير .. و بعديها بيجى سبوع كده .. حميتة طلع حمارجارنا اللى أتسرق .. ههههههه .
( يضحك الجميع .. ثم تقل الأضاءة تدريجياً الى أن تختفى تماماً)

عيد سعيد

كل سنة وأنتم طيبيين ... عيد سعيد على كل المدونين وانشاءالله تبقى السنه دى أحلى وأحلى من اللى قبلها يارب .. متنسووووووش صلاة العيد




أنا كنت عاوزة أكتب البوست دة بعد الصلة وأعيد على كل الناس ... بس خفت يبقى النت بكرة مش شغال أو الجهاز عطلان كالعادة .. فقلت اعيد بدرى عليكم واهو بامرة أكون أول الناس

وجهة نظرك

كان بقالى فتره فى موضوع شاغل بالى وبجد عايزه أعرف وجهات النظر المختلفه للناس فيه
.. كنت عايزه أعرف لو أنت مثلاُ خاطب واحده .. هتتحكم فى طريقة لبسها و فى الناس اللى مفروض تعرفهم ولا هتسبها هى اللى تختار .. طب ولو نفطرد أنك خطبت واحده كانت أصلاً لبسها ضيقها وتعرف صبيان .. هتمنعها بعد الخطوبه أنها تغير من لبسها و تقاطع الناس اللى هى تعرفها .. ولا هتصرف نظر أصلاً عن أنك ترتبط بيها .. ونفترض أنك بتحبها وعايزها ليك بس حابب أنك تغير منها وحاسس أنها عندها استعداد أنها تتغير .. هيكون أيه الأسلوب اللى هتستعمله معها عشان تغير منهت بس بارادتها هى .. يعنى هى اللى تيجى وتقولك .. أنا هتحجب عشان ربنا .. وهى اللى تيجى تقولك أنا مش هكلم فلان وفلانه .. عشان احترام لنفسى وليك .. هتعمل أيه عشان الكلام ده كله يطلع منها هى .. وعلى العلم بقى أنك بتحبها وواقع فيها و هى كمان يعنى أكيد هتكون بتحبك ..................................... أما بالنسبه بقى للبنات فأنا عايزه أعرف مثلاً لو انتى حبيتى واحد ولا قيتيه بيتحكم فى اسلوب حياتك وطريقتك فى التفكير هيكون ايه رد فعلك معاه عشان تمنعى ده وتغيرى من أسلوبه ( مع العلم انك برده بتحبيه .. لأنك لو مش بتحبيه مش هترتبطى بيه اصلاً ههه..
()
كمان فى حاجه لفتت نظرى الأيام دى أوى. الواحد والواحده يرتبطوا .. وال أيه بعد فتره يكتشفوا أن طباعهم مش متوافقعه مع بعضهم .. فعشان كده لازم بقى يا حبته عينى يسبوا بعض .. طب فين الحب بقى والرضى .. ولا هو كل واحد عايز حد متفصل على مزاجه .. فين الأصرار أننا نعيش فى الحياه دى طالما أختارنا مصيرنا بايدينا .. ليه نسب الطلاق والفراق بين الأحباب بتزيد كل يوم أكتر من اللى قبله .. ليه مبقاش حد عايز ولا طايق يستحمل حد على عيبه .. كل واحد معاه واحده .. أو كل واحده معاها واحد .. تبص على ميزه فى حد بره ويندموا أوى أنها مش موجوده فى حبيبهم .. طب متيبصوا بردوا على العيوب اللى فى الناس اللى بره ... أو كنتوا ليه بقى بترتبطوا من الأول يا شباب مصر طالما أنتوا خلقكوا ضيق ومشاكل الحياه طحناكم .. ليه المجازفه .. ومحدش بقى طايق يستحمل حد على عيبه .. با صين دايمن لمزايا الناس اللى بره .. جتكم خيبه .. طب شوفوا العيوب ممكن تتعالج ازاى بدل ما تبصوا على أيه هى العيوب وكل واحد يحسبها أد أيه .. ولو اتجوز هيفضل كده العيب ده بقى وينكد عليه عيشته .. وطاما أنتوا عندكم بعد نظر أوى كده .. ما تبصوا شويه يا فتيات وفتيان مصر ازاى تحلوا المشاكل .. المشكله هنا فى مصر .. ان محدش بيرضى بنصيبه وباللى ربنا قسمهولوا .. كل واحد عايز يبقى أحسن من أخوه .. بأى شكل ... وكل واحده عايزه تتجوز واحد أحلى وأشيك وأزوق من الى صحبتها خدتها .. وده طبعاً عشان هى الأحسن فلازم يكون ليها فتى أحلام ولا فى الأحلام .. وفالحين بس الشباب تقول مش عارفيين نعمل أيه من غلاء الأسعار والشباب يقولك البنات بقت كلها زباله .. والبنات تقول كل الولاد خانين و شاحتين ... بدل ما يبصوا على الجانب الحلو .. عينا دايماً بتروح على الجانب السيىء ليه كده أنا مش عارفه بجد .. كل واحد همه يتحكم فى اللى قصاده وخلاص .. الرجل ينتحكم فى الست عشان هو كده .. بدل ما يعاملها بأسلوب يخليها هى تحترمه فى غيابه .. والست غاويه تعكنن على جوزها .. عشان هو كده الرجاله مبتمشيش غير بالعكننه .. وأصله هى يعنى الى ما بتمشى ب الطريقه هذه .. أنا كتبت البويست الغريب ده بجد عشان كل واحد يقول رأيه بصراحه .. هو يحب يعامل خطبته أزاى .. وكل واحده تقول تحب خطيبها يعملها أزاى .